Best Shayari Of Aitibar Sajid| Aitibar Sajid Poetry

Maal-O-Zar Kay Kisi Anbaar Say Kia Lena Hai

Maal-O-Zar Kay Kisi Anbaar Say Kia Lena Hai,

Ishq Ko Garmi-E-Baazaar Say Kia Lena Hai.

Tere Kunbe Ki Wiraasat Say Hamein Kya Matlab?

Tujh Se Matlab Hai Pariwaar Say Kia Lena Hai.

Umr Bhar Saath Jo Dena Hai Tou Phir Baat Karo,

Ham Ko Mehmaan Adaa-Kaar Say Kia Lena Hai.

Konsay Ham Bhi Farishtay Hain Kay Tujh Ko Jaanchai'n,

Teri Seerat, Teray Kirdaar Say Kia Lena Hai.

Jhonpri Apni Banaa Lengay Kisi Goshay Mein,

Qasr-E-Shaahi! Teray Me'maar Say Kia Lena Hai.

Apnay Ashko'n Kay Liye Jaib Mein Roomaal Rakho,

Kaam Apna Kisi Gham-Khaar Say Kia Lena Hai.

Barf-Baari Ka Wo Sheedaayi Hai SAJID Us Ko,

Teray Jaltay Huwe Ash'aar Say Kia Lena Hai.